ថ្មីនេះៗ ក្លឹប Borussia Dortmund បានចុះកុងត្រារយៈពេល៥ឆ្នាំជាមួយកីឡាករសញ្ជាតិអាល្លឹម៉ង់ថ្មីម្នាក់ ដែលមានឈ្មោះថា Marius Wolf ។ Wolf នឹងលេងអោយក្លឹបអធិរាជខ្មៅលឿងរហូតដល់ឆ្នាំ២០២៣ ក្រោមការដឹកនាំរបស់គ្រូបង្វឹកថ្មី គឺលោក Lucien Favre សញ្ជាតិ Switzerland ។
កីឡាករវ័យ២៣ឆ្នាំរូបនេះ នឹងមកកាន់ទឹកដី Signal Iduna Park ចាប់ពីថ្ងៃទី១ ខែកក្កដា ឆ្នាំ២០១៨ នេះតទៅ ហើយនឹងពាក់អាវលេខ២៤អោយក្លឹប ។ យើងសូមធ្វើការណែនាំប្រវត្តិខ្លះៗ របស់កីឡាករចំណូលថ្មីទី១របស់ក្លឹប ៖
ថ្ងៃខែឆ្នាំកំណើត និងស្រុកកំណើត
Marius Wolf បានកើតនៅថ្ងៃទី២៧ ខែឧសភា ឆ្នាំ១៩៩៥ នាទីក្រុង Coburg ប្រទេសអាល្លឺម៉ង់
កម្ពស់ ១ម៉ែត្រ៨៧
តួនាទីលេង ខ្សែបម្រើស្លាប
ប្រវត្តិនៃការលេង
Wolf គឺជាអតីតយុវជនរបស់ក្លឹប 1860 Munich ដែលបានបង្ហាញខ្លួនលើកដំបូងអោយក្លឹបក៏ដូចជាក្នុងក្របខណ្ឌ 2.Bundesliga នៅថ្ងៃទី២៦ ខែតុលា ឆ្នាំ២០១៤ ប្រកួតទល់នឹងក្លឹប Braunschweig ក្នុងលទ្ធផលចាញ់ 1-2 ដែលត្រឹមជាកីឡាករបម្រុងដូរជំនួសកីឡាករ Valdet Rama ។
គាត់បានចំណាយពេលប្រមាណជា៤ខែ ដើម្បីទាត់បញ្ចូលទីគ្រាប់ដំបូងអោយក្លឹប ពោលគឺនៅថ្ងៃទី២១ ខែកុម្ភៈ ឆ្នាំ២០១៥ ដែលជាការប្រកួតរវាង 1860 Munich ទល់នឹង St.Pauli ក្នុងលទ្ធផលឈ្នះក្រុមភ្ញៀវ 2-1 ។
នៅថ្ងៃទី៨ ខែមករា ឆ្នាំ២០១៦ កីឡាកររូបនេះ ត្រូវបានផ្ទេរមកកាន់ក្លឹប Hannover 96 ។ នៅទីនោះបានតែ១ឆ្នាំ គាត់ក៏ត្រូវបានក្លឹប Eintracht Frankfurt ខ្ចីបន្ត នៅខែមករា ឆ្នាំ២០១៧ ។ ដោយសារឃើញការលេងបានល្អ ក្លឹបថ្មីក៏សម្រេចចិត្តទិញផ្តាច់ នឹងចុះកុងត្រារហូតដល់ឆ្នាំ២០២០ ។
ចុងក្រោយនេះ ដោយសារគាត់បង្ហាញទម្រង់លេងយ៉ាងល្អ ធ្វើអោយក្លឹប Borussia Dortmund ទិញ នៅថ្ងៃទី២៨ ខែឧសភា ឆ្នាំ២០១៨ ជាមួយកុងត្រា៥ឆ្នាំ ។
ពានរង្វាន់ដែលបានទទួល
DFB-Pokal 2017-2018 : កីឡាកររូបនេះបានចូលរួមចំណែកយ៉ាងច្រើនក្នុងការជួយអោយ Eintracht Frankfurt លើកពាន ដែលប្រកួតផ្តាច់ព្រ័ត្រជាមួយក្លឹបយក្សប្រចាំប្រទេសគឺ Bayern Munich ។
អត្ថបទ : ឃិន សំណាង
រូបភាព : Borussia Dortmund
